ភ្នំពេញ៖ ក្រសួងការងារបានប្រកាសដល់កម្មករនិយោជិតនៃក្រុមហ៊ុន YAO TAI SHOES ដើម្បីបើកប្រាក់បុរេប្រទានរបស់រាជរដ្ឋាភិបាលដោះស្រាយជូនកម្មករដែលមានទំនាស់ជាមួយក្រុមហ៊ុន។

កម្មករនៃរោងចក្រខាងលើអាចទៅទទួលប្រាក់ឈ្នួល និងប្រាក់អត្ថប្រយោជន៍ផ្សេងចាប់ពីម៉ោង ២រសៀល ថ្ងៃទី៧ ខែកញ្ញា តទៅ នៅអគ្គលេខាធិការដ្ឋាន គណៈកម្មការសម្រាប់ដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញា ដែលមានទីតាំងនៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ។

កម្មករដែលត្រូវទៅទទួលប្រាក់ដោះស្រាយនេះត្រូវភ្ជាប់មកជាមួយនូវឯកសារ ប័ណ្ណសម្គាល់ខ្លួនកម្មករនិយោជិតច្បាប់ដើម ឬកិច្ចសន្យាការងារ និងសៀវភៅការងារ ឬប័ណ្ណបេឡាជាតិសន្ដិសុខសង្គម ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន។

កាលពីថ្ងៃទី១៧ ខែសីហា ឆ្នាំ២០២២ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជំរុញក្រសួងការងារឱ្យពន្លឿនការដោះស្រាយវិវាទការងារជូនដល់កម្មករក្នុងនោះសម្ដេចតេជោបានបញ្ជាឱ្យក្រសួងមួយនេះយកលុយពីរដ្ឋបើកដោះស្រាយជូនកម្មករជាមុនផងដែរ មុននឹងមានចំណាត់ការបន្តលើក្រុមហ៊ុនដែលគេចវេសនោះ៕